飛機延誤8小時先好Claim旅保 保險索償要點你要知

最近消委會調查16間保險公司18個保險計劃，發現同一個目的地不同計劃保費相差近乎7倍。其中「太平保險」太平旅遊寶（尊尚計劃）的收費最高，但保障項目又唔係最多，最高賠償額不突出，仲要唔包唔見電腦同手機，或者及交通延誤引致的損失，真係太過分！消委會指保費與保障範圍及最高賠償額未必有直接關係。

邊個去旅行想飛機delay先得嫁，不過去到真係delay嘅時候，大家第一時間就唔係可惜行程延誤啦，而係想claim保險。唔好心急，等我提提你啦。市面幾乎所有旅遊保險都只係賠償超過5至6小時嘅延誤，更有保險只賠償8小時或以上嘅延誤。宜家先發現？覺得買黎都無用，因為根本delay得唔夠耐就唔會有機會claim到，但損失又真係存在？係嫁，消委會都幫口，表示係香港出發嘅航班極少延誤超過5小時，所以認為消費者能獲得相關保障可能性極低，認為旅保對有關要求太嚴苛。

出發前睇睇下面Claim保險嘅注意項目啦，為自己搵份最好嘅旅保，出外都唔洗心掛掛啦。

1.醫療保障

外遊患病或者發生咩意外都好，一定要洗當地睇合資格嘅醫生，記得要拎埋醫療報告作證明，返到香港儘快聯絡保險公司申請索償，（保險索償有指定期限嫁！）了解返之後治療又點計法。

2.行李箱損毀

發現個喼爛左，第一時間要同航空公司，或者乘搭個客運公司索償先！仲要拎相關嘅索償證明文件，咁樣之後比保險公司睇，先有機會作進一步賠償。有d保險公司仲會要求提供：行李箱嘅保用証、損毀檢查報告、維修報價等，真係好麻煩。你以為咁就有得claim？祈下禱啦。保險公司分分鐘最後會選擇換過新嘅行李箱而唔係幫你整，如果你好鍾意隻喼，咁就真係幫你唔到啦。

3.電子產品被偷

現時只有7個旅保計劃提供手機保障，包括世聯保險優悠樂、安盛「卓越」優遊樂典雅計劃、忠意保險旅遊綜合保險計劃、豐隆保險旅遊保險、Starr Insurance「卓悅遊」旅遊保險、泰加保險旅遊保險及蘇黎世保險樂優遊+，但保障額只介乎2,000元至3,000元，保得仲少過一般財物，叫做好過冇囉。

相片來源：airviation @Tumblr