因為一張gif圖紅遍內地 鄭子誠梁健平擔正拍內地手遊廣告

近年越嚟越多藝人選擇北上搵銀，就好似近日有網民發現「完美奸人」鄭子誠同梁健平獲內地手機遊戲（手遊）公司邀請拍廣告，點解會搵佢哋？原來係因為一張gif圖。

「抱歉，有錢是真的能為所欲為的」嘅gif圖，相信唔少人嘅手提電話都有，其實係出自於《讀心神探》嘅一場戲，警察黎諾懿跟蹤黑社會話事人鄭子誠被發現，繼而發生口角，黎諾懿話：「你咪以為有錢大晒呀？」，之後鄭子誠好有霸氣咁回答佢話：「Sorry，有錢真係大晒，不過我諗佢唔會明呢個意境。」除咗香港網民熟悉呢句之外，原來內地網民對呢句對白都唔陌生。佢哋仲因為呢句說話喺內地紅咗，所以有內地手遊公司就睇中佢哋，搵佢哋著返當年呢一幕嘅造型拍攝廣告，廣告名仲叫「有錢也不能為所欲為」，將經典重現。

就連鄭子誠都話估唔到，佢仲喺社交網站上載圖片及留言話同梁健平好多年無見，估唔到因為7年前電視劇劇中一個畫面嘅一句說話，令佢哋喺上海再一次合作。

另外，手遊公司CEO亦有喺社交網站留言話搵佢哋拍廣告係想諷刺「有錢可以為所欲為」呢個觀點，佢哋想表達嘅價值觀嘅正正就係呢個世界嘅美好、正義、公平係唔可以用金錢去衡量嘅干涉。