Yahoo奇摩財經 
吳若希老公爆兩歲囡囡有公主病 網民：呀媽係致病源！
話說，今日係吳若希（Jinny）囡囡Giselle兩歲生日，Jinny及老公Alex各自喺個人社交網罕有上載囡囡慶生正面相，並發長文留言分享對愛女生日嘅感受，點知Alex除大爆呀女有公主病之餘，仲話呀女開始會…
撰文：東方新地｜圖片：吳若希Instagram、AlexHoIG
延伸閱讀：
吳若希孖老公慶祝囡囡生日
今日，吳若希（Jinny）囡囡Giselle兩歲生日，Jinny晒出一張同老公Alex咀囡囡塊面珠變晒形嘅相，留言：「每次睡前回看她小時候的照片，我都會很詫異，以前那個小肉團怎麼突然懂得走路說話？！好神奇！！
時間過得好快，每天都有不想你長大的感覺，可是每當我見到你一點點的成長，我又會好欣慰，覺得你好聰明好可愛～
怎麼辦？好矛盾～」，而且「再一次影低我地強吻BB既罪證」
吳若希老公爆兩歲囡囡有公主病
不過講到爆都係老公Alex嘅留言，皆因Alex大爆：「她默默地邁向公主路線。她開始有脾氣，她開始有性格，她開始有堅持，她…………開始會打爸爸。以上特徵我們稱之為『公主病』，被我寵出來的妹妹請繼續努力，將這個病發揚光大。希望你長大後能搵到一個像爸爸那樣『淋滋滋』，將你寵到公主癌而沒怨言的男人」，原來呀女已經開始會打人！
有唔少網民就留言關心囡囡Giselle，皆因呀女個樣被父母太用力而夾到變豬樣，網民都紛紛話慘慘豬！不過，亦有網民笑Alex係個冇脾氣嘅男人，笑稱Giselle打爸爸有出息～
吳若希 同老公感情淡薄冇話題
日前有讀者向傳媒爆料指見到吳若希帶女兒到一所幼稚園面試，期間見老公Alex不停傾電話於是黑面睥實佢，吳若希被問到此事時表示希望囡囡入讀呢間學校，但就冇印象曾對老公黑面：「我好少喺公開場合黑佢面，最多只係無表情，返屋企先反白眼，通常有囡囡嘅時候我係唔理老公！」她坦言2歲囡囡太可愛所以無暇理會老公，問到會否令人覺得夫妻感情好似好淡薄，她回應話：「係呀，同佢唔係好熟呀依家，我哋好少傾兩個人嘅嘢，話題都係講個女，有時打開話題係話女兒得意或者講工作。」
講到老公Alex由澳門搬到香港居住在港少朋友，吳若希說有介紹朋友畀老公認識，又話會幫手宣傳丈夫的生意。
傳吳若希婚姻亮紅燈
吳若希早前突然於個人社交網發感性文，寫道：「一根刺，種下後會慢慢發芽，到它長大後，會變成刀～婚姻中的忍讓不是必然，現實不是宮廷劇，夫妻關係也不再是#日月存亡 。對不起 我不認同妻子要為不愛（不懂愛）她的男人卑躬屈膝。」，睇落似乎空穴來風！
發文一出，大家隨即不斷猜測吳若希同老公
Alex婚姻係咪出現咗紅燈！但其後，Jinny就向傳媒表示自己都唔妥老公好耐，又食煙、又成日喺被竇放臭屁，講到明忍夠老公咁話！起勢投訴老公，睇嚟真係好不滿喎！但原來Jinny係為熱播緊嘅《如懿傳》所主唱嘅主題曲做宣傳！睇嚟Alex都幾忍得Jinny，皆因自己老婆竟然為咗宣傳新歌而大爆咁多老公日常出嚟俾大家知。
玩「30日婚變challenge」
2月時，Jinny更在Instagram許下一個為期30日的「婚變challenge」，她說睇得太多有關自己婚變的報道，「令我自己都開始產生幻覺
覺得自己想離婚」，在這30天的挑戰中，她要每天說老公一個優點，證明自己有幾愛對方。她第一天寫：「#day1
脾氣好，怎麼發他脾氣，他也是沒有表情」
唔post代表搞緊離婚
第二天則寫：「#day2簡單～我老公是一個很簡單的人，覺得這個世界有壞人～
所有人都是朋友，所有人都沒有私心，所以他也經常被人利用、擺上檯～
有時我會很討厭他這種簡單，因為這種簡單麻煩了他身邊的人（比如我…還有他媽），但換個方向想，幸好他簡單，我才能肯定我是他的唯一。有時他的優點也是他的缺點，夫妻便是接受他的缺點，把它變成優點💙」
有網民話佢係數緊老公嘅缺點，而唔係優點，更有人指Alex畀Jinny擺上枱，但吳若希親自留言回應網民：「如果我有一日無post 果日應該真係準備緊離婚！」
Jinny：老公真係好鍾意通渠！
而第12日，Jinny表示老公優點係「不介意分擔家務」，事緣Jinny買了通渠水準備通渠，點知老公爭住幫手仲喺廁所睇咗幾分鐘未走，Jinny話「佢真係好鍾意通渠！」
Day 30，吳若希話老公嘅優點係瞓覺唔郁，保持同一姿勢到天光，令愛大字形睡覺的她可以霸晒4分3張床！
「30
days婚變challenge」話咁快就完成，Jinny喺day30「終章，愛的感悟」中坦言﹕「首要目的並不是想放閃、或是炫耀Alex對我有多好，而是在那段時間我倆之間有一些不算大、不過也不算小的磨擦，個人情緒最低落的時候，我甚至一度懷疑自己當初選擇了他的決定是否正確……」
但冷靜下來發現無人完美，更表示呢個30日婚變挑戰中重新找回愛對方嘅理由：「幸好，在這一個月裏，我真的能夠一步一步，重新學會欣賞他的優點，而心態上我也成功調校到我當初認識他的時候。原來，當我再次把他優點放大的時候，我才知道我對他的感覺根本絲毫沒有變過，我仍然是那麼的愛他、想關心他、想照顧他、想和他一起終老。」
Alex隨後留言多謝老婆發掘到佢咁多優點，仲話：「這女人常常問我『我係咪好惡？我係唔係好野蠻？我係唔係好任性？』此時此刻，我只可以引用某天王的金句『係，你好惡，你好野蠻，你好任性，但，係我揀的。』如果你唔惡，唔野蠻，唔任性，這就不是你，這就不是當初我選擇的你。」
Alex又話：「多謝妳，多謝妳給這個溫暖的家，多謝你給我那麼『打意』的小女孩，沒有你，我甚麼都不是，沒有你，我不會撐到今天。I Love you until the end of my life.」
