【兩天行程】台灣親親山林之旅 埔里行程住宿推介

台中對於大家嚟講，可能只係會諗起清境牧場、日月潭呢啲地方，不過都已經發展得好成熟，其實唔算新之餘，有時仲因為太多遊客導致相當擠迫。其實台灣人好多都已經另覓新地方，就係被稱為台灣中心區南投縣嘅埔里小鎮！呢個地方離台中市區約2小時車程，但就自成一國，仍然保留台灣嘅古早味感覺，就算遊客都係台灣本地客為主。今次為大家炮製呢個兩日行程，大家睇下有幾好玩啦！

Day1 早上

台北/南前往台中

由於南投尚未有高鐵，只能剩坐高鐵至台中站，再轉乘客運巴士前往南投，全程約2小時20分。

中午

輕鬆下午山中行：九九峰森林步道

去到南投，食個便飯就，過咗太陽最曬一刻，好應該出發體驗一下南投嘅大自然喇！埔里位於台灣之中心，大家都知台灣中央山脈由北貫穿至中部再伸至南部，所以中央山係台灣群山中心地。呢條九九峰森林步道非常易行，全長1,930呎，由99個小山峰組成；配套十分完善，可以話由老至嫩都可以輕鬆駕馭，最適合第一日去到做為小小嘅登山活動，接觸同感受一下台灣中部嘅靈氣。

九九峰森林步道

地址：南投草屯鎮

路線建議：分為南、北兩邊入口，建議由北邊入口行，南邊走

晚上

住宿藝術館：牛耳藝術渡假村

話明藝術做主題，當然唔係一般渡假村，平日就算唔入住都要收入場費，因為入面有唔少現代藝術裝置，都係融入當地自然環境，例如石雕塔，包括人及動物造型有；另外亦有原住民風格圖騰等。另外當在都係桐花林，每年到五月就會變成一片桐花海。住宿方面都係小木屋，夠晒天然，人多嘅話仲可包括VIP，有兩間客房呢。另外仲有SPA大浴場，冷熱池、桑拿房、按摩都有，最啱舟車勞頓又行完半日山嘅朋友去歎吓。

牛耳藝術渡假村

地址：南投埔里鎮中山路4段1號

訂房：按這裡

Day 2

中午

古早味埔里名物：阿菊肉圓

早上喺渡假村再嘆一輪後就Check Out，如果要喺埔里選擇一樣名物，當然要去阿菊肉圓。名副其實古早味肉圓，不過原來開業時間只係20年，但卻將傳統老店都比下去，每日都要排起碼半個鐘至一個鐘先有得食，店內只賣四種食物：肉圓、羮湯、羮麵、羮飯；肉圓係當中名物，以白色肉圓內包著一大片燒好嘅肥豬肉片，加埋細小嘅筍丁同特製醬汁，一流！

阿菊肉圓

地址：台灣南投縣埔里鎮西安路一段33號

營業時間：11:30AM至5PM（星期二休息）

下午

草地歎咖啡：虎嘯山莊

南投埔里大自然，當然要再親近一下先好走，行程最後可以嚟到虎頭山觀景台，欣賞埔里盆地，之後再到旁邊嘅虎嘯山莊，呢度可以玩嘅嘢非常多，包括滑翔傘、Wild Camping等，仲有草地上嘅咖啡店，一大片落地玻璃望住日落，吹下自然風，絕對係難得嘅體驗！

虎嘯山莊

地址：南投縣埔里鎮知安路100號

預約及介紹：按這裡

【立即讚好】全新 Yahoo 旅遊 Facebook 專頁

Yahoo 旅遊以全新樣貌登場，Facebook 專頁當然同時煥然一新！立即讚好，每日睇盡旅遊新資訊！